កម្ពុជាគ្រោងសាងសង់ Express Way តម្លៃជាង2,000លានដុល្លារ

ទំព័រដើម | អំពីយើង | ទំនាក់ទំនង | English

មើល 2104 ដង / 2016-06-14, 14:46:28

កម្ពុជាគ្រោងសាងសង់ Express Way តម្លៃជាង2,000លានដុល្លារ

ក្នុងគោលដៅទាក់ទាញយកតម្លៃបន្ថែមពីសេដ្ឋកិច្ច និងដើម្បីកាត់បន្ថយតម្លៃលើសេវាដឹកជញ្ជូននោះ រាជរដ្ឋាភិបាលកម្ពុជាគ្រោងនឹងសហការជាមួយអ្នកវិនិយោគជប៉ុនដើម្បីសាងសង់ផ្លូវល្បឿនលឿន Express Way មួយខ្សែដែលមានតម្លៃជាង2,000លានដុល្លារ ដោយចាប់ផ្តើមចេញពីរាជធានីភ្នំពេញទៅកាន់ក្រុងបាវិតជាប់ព្រំប្រទល់ប្រទេសវៀតណា។

អ្នកវិភាគសេដ្ឋកិច្ចឯករាជ្យ លោកបណ្ឌិត ម៉ី កល្យាណបានថ្លែងថា គម្រោងសាងសង់ផ្លូវល្បឿនលឿនពីរាជធានីភ្នំពេញទៅកាន់ក្រុងបាវិត អាចនឹងចាប់ផ្តើមនាពេលឆាប់ៗនេះហើយ ព្រោះគម្រោងនេះកំពុងសិក្សាដោយទីភ្នាក់ងារសហតិបត្តិការអន្តរជាតិនៃប្រទេសជប៉ុន (JICA) និងទទួលបានការយល់ព្រមពីសម្ដេចអគ្គមហាសេនាបតីតេជោ ហ៊ុន សែន រួចហើយ។ លោកបានបន្តថា គម្រោងសាងសង់ផ្លូវល្បឿនលឿននេះនឹងមិនធ្វើនៅលើផ្លូវជាតិលេខ1ទេព្រោះបើធ្វើលើផ្លូវជាតិលេខ1 នឹងមានផលប៉ះពាល់ប្រជាពលរដ្ឋច្រើន។

លោកបានមានប្រសាសន៍ថា ៖ “គម្រោងសាងសង់ផ្លូវនេះគ្រោងនឹងចំណាយប្រាក់ជាង 2,000លានដុល្លារអាមេរិកដែលថវិកានេះគេនៅ មិនទាន់ដឹងថា បានពីប្រភពណា ឬជាថវិកាកម្ចីសម្បទានពីប្រទេសជប៉ុននោះទេ”។ លោកបានបន្តថា ៖ “ការធ្វើផ្លូវថ្មីនេះនឹងធ្វើឱ្យមានតំបន់អភិវឌ្ឍន៍ថ្មីបន្ថែមទៀតផងដែរ”។

អ្នកវិភាគដដែលបានឱ្យដឹងទៀតថា អ្វីដែលពិសេសនោះគឺកម្ពុជាស្ថិតនៅចន្លោះរវាងប្រទេសវៀតណាម និងប្រទេសថៃ ដែលចំណុចនេះនឹងធ្វើឱ្យកម្ពុជាទទួលបានផលប្រយោជន៍ជាច្រើននាពេលអនាគត។ លោកបន្តថា បច្ចុប្បន្ននេះរាជរដ្ឋាភិបាលក៏មានគម្រោងសាងសង់ផ្លូវល្បឿនលឿនពីភ្នំពេញទៅកាន់ខេត្តព្រះសីហនុផងដែរ ដែលផ្លូវថ្មីនេះគ្រោងនឹងសាងសង់ឡើងដោយក្រុមហ៊ុនមកពីប្រទេសចិន ប៉ុន្តែដំណើរការរៀបចំសាងសង់ផ្លូវនេះហាក់នៅមានលក្ខណៈស្មុគស្មាញនៅឡើយ។

លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងថា ការសិក្សាផ្លូវល្បឿនលឿននេះជិតចប់ហើយ ដោយពេលនេះកំពុងដំណើរការចរចាជាមួយប្រទេសវៀតណាមទាក់ទងនឹងការតភ្ជាប់គ្នា និងការបើកព្រំដែនថ្មី ឬក៏គម្រោងផ្លូវនេះភ្ជាប់ទៅកាន់ព្រំដែនបាវិត ខណៈពេលនេះប្រទេសវៀតណាមនៅមិនទាន់ឆ្លើយតបទេ។ លោកបន្តថា តាមគម្រោងរបស់ជប៉ុនផ្លូវនេះគ្រោងបញ្ចប់ការសាងសង់នៅក្នុងឆ្នាំ2033 ប៉ុន្តែឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបង្ហាញបំណងចង់ឱ្យការសាងសង់ផ្លូវនេះបញ្ចប់ក្នុងឆ្នាំ2023។

លោក វ៉ា ស៊ីមសូរិយា បានថ្លែងថា ៖ “ផ្លូវនេះនឹងធ្វើឡើងដោយវិស័យឯកជន និងថែរក្សាផ្លូវដោយក្រុមហ៊ុនឯកជន ព្រោះផ្លូវនេះជាតម្លៃបន្ថែមមួយក្នុងការជួយជំរុញកំណើនសេដ្ឋកិច្ចរបស់កម្ពុជាបន្ថែមទៀត”។

ផ្លូវថ្មីនេះនឹងស្ថិតនៅប៉ែកខាងជើងនៃទន្លេមេគង្គ ដោយមានប្រវែងប្រហែល160គីឡូម៉ែត្រចេញពីរាជធានីភ្នំពេញឆ្ពោះទៅកាន់ព្រំដែនវៀត-ណាម។ ការសាងសង់ផ្លូវនេះនឹងធ្វើឡើងជាបីដំណាក់កាល ដោយដំណាក់កាលទី1 ចាប់ផ្តើមពីរាជធានីភ្នំពេញទៅខេត្តព្រៃវែង ដំណាក់កាលទី2 ចាប់ផ្តើមពីខេត្តព្រៃវែងទៅកាន់ខេត្តស្វាយរៀង និងជំហានទី3 ចេញពីខេត្តស្វាយរៀងទៅដល់ព្រំប្រទល់ប្រទេសវៀតណាម។

អគ្គនាយកក្រុមហ៊ុន Century21 Mekong លោក ច្រឹក សុខនីម បាននិយាយថា ផ្លូវជាតិលេខ1កំពុងទទួលការចាប់អារម្មណ៍ និងមានការអភិវឌ្ឍបែបស្ងៀមស្ងាត់ ខណៈនៅពេលនេះមានអ្នកវិនិយោគចិនជាច្រើនកំពុងប្រមូលទិញដីនៅស្របតាមបណ្តោយផ្លូវថ្មីនេះ។ លោកបានបន្តថា ផ្លូវជាតិលេខ1 នឹងមានការអភិវឌ្ឍខ្លាំងនាពេលអនាគត ព្រោះមានគម្រោងវិនិយោគធំៗជាច្រើនគ្រោងនឹងរៀបចំដំណើរការនៅតំបន់នោះ។

លោក ឈឹម ផល្លា ប្រធាននាយកដ្ឋានទំនាក់ទំនងអន្តរជាតិទទួលបន្ទុកគម្រោងរបស់ប្រទេសជប៉ុននៃក្រសួងសាធារណការ និងដឹកជញ្ជូន បានប្រាប់ថា តាមការសិក្សាបង្ហាញថា កម្ពុជាត្រូវការផ្លូវល្បឿនលឿនប្រវែងជាង2,000គីឡូម៉ែត្រដើម្បីជួយសម្រួលដល់ការដឹកជញ្ជូន និងលើកកម្ពស់សេដ្ឋកិច្ច ប៉ុន្តែក្នុងចំណោមនោះក្រសួងបាននិងកំពុងគិតពីការស្ថាបនាផ្លូវអាទិភាពជាមុនសិន គឺផ្លូវល្បឿនលឿនចេញពីរាជធានីភ្នំពេញទៅកាន់ក្រុងបាវិត និងផ្លូវល្បឿនលឿនចេញពីរាជធានីភ្នំពេញទៅកាន់ខេត្តព្រះសីហនុ។

លោកបានអះអាងថា ៖ “ចំពោះគម្រោងសាងសង់ផ្លូវល្បឿនលឿនចេញពីភ្នំពេញទៅកាន់ក្រុងបាវិត នេះ ក្រុមហ៊ុនជំនាញ និងអ្នកបច្ចេកទេសនៃអង្គការ JICA កំពុងសិក្សាដោយមិនទាន់ដឹងថានឹងបញ្ចប់នៅពេលណានោះទេ ប៉ុន្តែប្រសិនបើគម្រោងនេះរលូនទៅមុខ ការសាងសង់ផ្លូវនេះនឹងអាចចាប់ផ្តើមក្នុងឆ្នាំ2018 ឬឆ្នាំ2019”។ លោកបន្តថា ៖ “វាជាផ្លូវល្បឿនលឿន ប្រសិនបើផ្លូវធម្មតាធ្វើដំណើរ4ម៉ោង តែនៅពេលផ្លូវនេះសាងសង់រួចការធ្វើដំណើរអាចកាត់បន្ថយមកត្រឹម1.30ម៉ោង ទៅ 2ម៉ោងប៉ុណ្ណោះ ព្រោះផ្លូវនេះនឹងមានចំណុចឆ្លងកាត់ពីមួយទៅមួយប្រវែង10គីឡូម៉ែត្រឯណោះ”។

លោក ផល្លា បានបន្តថា ផ្លូវនេះជាប្រភេទផ្លូវបង់ប្រាក់ ដូច្នេះប្រសិនបើប្រជាពលរដ្ឋមិនចង់បង់ប្រាក់អាចធ្វើដំណើរតាមផ្លូវជាតិលេខ1 បាន។ តាមគម្រោងផ្លូវនេះអាចបើកបរក្នុងល្បឿន 130 ទៅ 150គីឡូម៉ែត្រក្នុងមួយម៉ោង៕